Un dos puntos máis importantes das asembleas anuais é debater e decidir que temas centrais sería conveniente tratar cada ano. Cada entidade socia, a partir do ámbito no que actúa e das súias sensibilidades, expón o seu punto de vista e xuntas debatemos e seleccionamos temas estratéxicos. Tamén afondamos nos enfoques, as persoas ou as organizacións clave das que obter análises e opinións, os posicionamentos, os puntos de conflito, etc. Abofé que a túa entidade ten algo que achegar e que aprender.

Por suposto, fóra da asemblea tamén podemos suxerir artigos, entrevistas e reportaxes, así como calquera idea que consideremos de interese. O equipo coordinador xestionaraa en colaboración co comité editorial.

Ademais, como colectivos asociados, podemos acordar o número de exemplares que queremos recibir en función do uso que lles vaiamos dar. Algunhas de nós repartímolos entre as nosas propias socias ou usuarias, algunhas pedimos exemplares adicionais porque o noso local é punto de venda e outras simplemente o temos como material de lectura colectivo.

En definitiva, as socias compoñemos a asociación que, entre outras cousas, elabora a revista Soberanía Alimentaria, Biodiversidad y Cultura. Esta publicación é nosa e podemos usala como mellor conveña ós nosos obxectivos, distribuíla entre a nosa xente, organizar debates ou sesións temáticas, etc.

Como instrumento ou colectivo movido polo ánimo de afondar no pensamento e na acción, unha vez temos a publicación entre mans, o máis importante é aproveitala ó máximo, dala a coñecer e xerar espazos de lectura e debate.

• Organización de presentacións. Na biblioteca da vila, nunha sede social, nun restaurante amigo… Hai infinidade de espazos axeitados para congregar á xente dos arredores e presentar o número que nos interese. É sinxelo poder contar nestes actos con algunhas das autoras do número para contar cunha voz en primeira persoa ou mesmo con algunhas das persoas do equipo ou comité editorial.
• Actividades periódicas. Moitas organizacións montamos faladoiros, cursos, clubs de lectura, xantares colectivos ou actos de celebración e xuntanza. Son espazos onde pode poñerse á venda a revista e mesmo podemos adquirir exemplares a prezo especial para agasallala ás persoas asistentes e dala a coñecer.
• É importante que Soberanía Alimentaria estea dispoñible nas bibliotecas públicas. Podes contactar coa do teu barrio ou vila e xestionar que reciba exemplares de maneira regular? Tamén pode interesar en centros socioculturais, bares cooperativos, salas de agarda, etc. Alí, unha ou dúwas revistas poden pasar por moitas mans (e ollos). Podemos deixar algunha revista de mostra e ofrecerlles que se subscriban.
• Redes territoriais. A revista tamén é un espazo e unha desculpa axeitada para xerar encontros entre organizacións afíns con miras a tecer redes e fortalecer o movemento en prol da soberanía alimentaria.
• Festivais culturais. Se coñecedes ou organizades festivais, estes tamén son espazos excepcionais onde facerlle un oco a Soberanía Alimentaria. Neste tempo, coñecemos e colaboramos cunha gran cantidade de artistas e podemos pensar xuntas accións creativas sobre temáticas relacionadas coa soberanía alimentaria e o mundo rural.
• E ben seguro que vos virán á cabeza moitas máis cousas.

Como axudar a sosternos?

O financiamento do proxecto é, loxicamente, unha das cuestións centrais e pasa por contar co máximo de complicidades. Niso as asociadas temos un papel clave, e é importante poñerlle agarimo e un pouco do noso xeito. A estratexia a ese respecto é sinxela: unha porcentaxe significativa do noso orzamento debería estar cuberto coas cotas das asociadas e das subscritoras, para sentirnos arroupadas e libres.

Algunhas ideas:

• Unha cuestión principal sería que falemos da revista Soberanía Alimentaria a outras entidades e persoas para que se queiran sumar a este espazo como subscritoras ou socias.
• Moitas organizacións preparamos e levamos adiante proxectos que inclúan actividades de sensibilización, formación ou educación. Aquí podemos atopar sinerxías, debido a que é o territorio onde a revista conta cunha longa traxectoria, contactos, ideas e experiencia, que ademais poden favorecer a aprobación dos proxectos. Cando esteades a pensar e orzar o proxecto… contactádenos!
• Entre as nosas actividades, moitas están relacionadas con investigacións e estudos. Trátase dun traballo que complementa á revista tanto en contidos como en financiamento, xa que todos eles están cofinanciados por entidades públicas ou privadas. Isto permite profundar en temas de interese e axuda a soster a publicación da revista. Se a vosa organización ten algunha necesidade nestes eidos, pódese propor algún tipo de colaboración.
• Tamén se aprecia moito que, como copropietarias e voceiras da revista, presentemos o seu labor ás administracións próximas e consigamos o seu apoio. Moitas delas dispoñen de convocatorias que poden contribuír á elaboración da publicación.
• Á parte diso, convennos atopar puntos de venda, coma tendas de alimentos ecolóxicos, grupos de consumo, librarías... ou calquera espazo onde estas temáticas esperten interese.
• E abofé que hai moitas máis fórmulas xenuínas do voso territorio e a súa poboación, no marco das propias actividades de voso, para conseguir fondos, novas subscricións e incorporacións.